காணி அபகரிப்புக்கு எவருக்கும் நாம் இடமளிக்கப்போவதில்லை! அமைச்சர் ஹரின் சபையில் உறுதி

திருகோணமலை குச்சவெளி, புல்மோட்டை பிரதேசங்களில் பொது மக்களின் காணிகள் அபகரிக்கப்பட்டிருப்பது உறுதிப்பட்டிருந்தால்,  அந்த மக்களுக்காக அதனை பாதுகாத்து வழங்க நடவடிக்கை எடுப்போம்.

காணிகளை பலாத்காரமாக பிடித்துக்கொள்ள யாருக்கும் இடமளிப்பதில்லை என காணி மற்றும் சுற்றுலாத்துறை அமைச்சர் ஹரின் பெர்னாண்டோ தெரிவித்தார்.

நாடாளுமன்றத்தில் வாய்மூல விடைக்கான கேள்வி நேரத்தின்போது எதிர்க்கட்சி உறுப்பினர் இம்ரான் மஹ்ரூப் எழுப்பிய கேள்யொன்றுக்குப் பதிலளிக்கையிலேயே அவர் இவ்வாறு தெரிவித்தார்.

இம்ரான் மஹ்ரூப் தெரிவிக்கையில் –

குச்சவெளி, புல்மோட்டை பிரதேசங்களில் மதகுரு ஒருவர் அண்மைக்காலமாக மக்களுக்கு சொந்தமான காணிகளை அத்துமீறி பிடிக்கின்ற ஒரு நிலைப்பாடு காணப்படுகிறது.

இவ்வாறான நடவடிக்கைகள் முன்னெடுத்துச்செல்கின்ற சுற்றுலாத்துறையை ஊக்குவிப்பது மாத்திரமல்ல, நாட்டில் இன ரீதியான பிரச்சினைக்கும் காரணமாக அமைகிறது.

அதனால் இந்த மதகுருவின் செயற்பாடுகள் தொடர்பில் காணி அமைச்சர் என்றவகையில் அறிந்திருக்கிறீர்களா அல்லது இவரின் இந்த செயற்பாடுகளுக்கு அரசாங்கம் எவ்வாறான நடவடிக்கை எடுக்கப்போகிறது?

குறிப்பாக இந்த மதகுரு வெள்ளிக்கிழமைகளில் முஸ்லிம் ஆண்கள் ஜும்ஆ தொழுகைக்குச் சென்றிருக்கும் வேளையில் பெண்கள் மாத்திரம் வீடுகளில் இருக்கும் நிலையிலேயே அத்துமீறி இவ்வாறு காணிகளைப் பிடிக்கும் நடவடிக்கைகளில் ஈடுபடுகிறார்.

காணி தொடர்பில் பிரச்சினை இருக்குமானால் அதனுடன் சம்பந்தப்பட்ட அதிகாரிகளுடன் கலந்துரையாடி நடவடிக்கை எடுக்காமல் இவ்வாறு காணி சுவீகரிப்பு நடவடிக்கை இடம்பெறுகிறது. இது தொடர்பில் எடுக்கும் நடவடிக்கை என்ன? – என்றார்.

இதற்கு அமைச்சர் தொடர்ந்து பதிலளிக்கையில் –

குச்சவெளி மற்றும் புல்மோட்டை பிரதேசங்களில்  காணி அபகரிப்பு தொடர்பில் உத்தியோகபூர்வமாக எந்த அறிவிப்பும் கிடைக்கவில்லை.

உத்தியோகபூர்வமற்ற முறையில் கிடைக்கப்பெற்ற அறிக்கைகளின் பிரகாரமே எமக்கு நடவடிக்கை எடுக்க வேண்டி இருக்கிறது.

இருந்தபோதும் அரசாங்கம் என்றவகையில் காணிகளை பலாத்காரமாக பிடித்துக்கொள்ள யாருக்கும் இடமளிப்பதில்லை என்பதே எனது நிலைப்பாடு.

என்றாலும், குச்சவெளி மற்றும் புல்மோட்டை பிரதேசங்களில் காணி அபகரிப்பு இடம்பெறுவது தொடர்பில் உங்களால் தெரிவிக்கப்பட்ட விடயங்கள் தொடர்பில் தேடிப்பார்த்து, அதன் உண்மைத்தன்மை தொடர்பாக அமைச்சின் செயலாளர் ஊடாக அறிக்கை ஒன்றை பெற்றுக்கொண்டு அறியத்தருகிறேன்.

அத்துடன் அந்த பிரதேசங்களில் பொது மக்களின் காணிகள் அபகரிக்கப்பட்டிருப்பது உறுதிப்பட்டிருந்தால், அந்த மக்களுக்காக அதனைப் பாதுகாத்து வழங்க நடவடிக்கை எடுப்போம் என்பதை உறுதியாகத் தெரிவிக்கிறேன்.

அத்துடன் சுற்றுலாத் துறை அபிவிருத்திக்காக அந்த பிரதேசங்களில் நாங்கள் காணிகளைப் பெற்றுக்கொள்ளும் போது அவர்களுக்கு மாற்று காணி வழங்குவதற்கு நடவடிக்கை எடுப்போம். – என்றார்.