அம்பாறையில் பாரிய இரண்டு மீன்கள் கரையொதுங்கி உள்ளன

அம்பாறை மாவட்டத்தில் இருவேறு இடங்களில்,  இன்று (ஞாயிற்றுக்கிழமை) காலை பாரிய மீன்கள் கரையொதுங்கின.

இதில் பொத்துவில் பிரதேச செயலக பிரிவிற்குட்பட்ட கோமாரி- 2 பிரதேசத்தில் அரியவகை நீல திமிங்கிலம் ஒன்று இறந்த நிலையில் கரையொதுங்கியுள்ளதை, பிரதேசவாசிகள் அவதானித்து அப்பகுதி கடற்படையினருக்கு அறிவித்துள்ளனர்.

இதன்போது சம்பவ இடத்திற்கு சென்ற கடற்படையினர், கரை ஒதுங்கிய மீனை பார்வையிட்டு மேலதிக நடவடிக்கையை மேற்கொண்டு வருகின்றனர்.

இதேவேளை அம்பாறை மருதமுனை – பெரியநீலாவணை கடற்கரையில் இன்று இராட்சத சுறாமீன் பிடிபட்டுள்ளது.

சுமார் 20 அடி, 1500 கிலோவிற்கு அதிகமாக, இந்த இராட்சத சுறாமீன்  இருக்கலாம் என மீனவர்கள் தெரிவித்தனர் .

கரைவலை மீனவர்களது  வலையில் சிக்கிய இராட்சத மீனை பார்வையிட பெருமளவு மக்கள் வருகை தந்திருந்தனர்.

அரிய வகை புள்ளி சுறாமீன், பொலிஸாரின் அறிவுறுத்தலுக்கு அமைய மீண்டும் கடலில் விடப்பட்டமை குறிப்பிடத்தக்கது.